ఐపీఎల్‌లో హైదరాబాద్ ఘన విజయం: పంజాబ్‌పై 33 పరుగుల తేడాతో గెలుపు

హైదరాబాద్‌లోని ఉప్పల్ స్టేడియం వేదికగా బుధవారం రాత్రి జరిగిన ఈ మ్యాచ్‌లో, తొలుత బ్యాటింగ్ చేసిన హైదరాబాద్ జట్టు నిర్ణీత 20 ఓవర్లలో 4 వికెట్ల నష్టానికి 235 పరుగుల భారీ స్కోరు సాధించింది. హైదరాబాద్ బ్యాటర్లు విధ్వంసకర ప్రదర్శనతో పంజాబ్ బౌలర్లను ముప్పతిప్పలు పెట్టారు.

హైదరాబాద్ ఇన్నింగ్స్‌లో ఓపెనర్లు అభిషేక్ శర్మ (35), ట్రావిస్ హెడ్ (38) దూకుడుగా ఆడారు. ఆ తర్వాత ఇషాన్ కిషన్ (55) అర్ధశతకంతో రాణించగా, హెన్రిచ్ క్లాసెన్ (69) కీలక పరుగులు సాధించి హైదరాబాద్‌ను భారీ స్కోరు వైపు నడిపించాడు.

236 పరుగుల భారీ లక్ష్యంతో ఛేదనకు దిగిన పంజాబ్ కింగ్స్ జట్టు ఆరంభంలోనే వికెట్లను కోల్పోయింది. కెప్టెన్ శ్రేయస్ అయ్యర్ (5) తో పాటు ప్రియాన్ష్ ఆర్య (1), ప్రభ్‌సిమ్రాన్ సింగ్ (3) కూడా విఫలమయ్యారు. మార్కస్ స్టోయినిస్ (28), సూర్యాన్ష్ షెడ్గే (25) కొంతసేపు క్రీజులో నిలబడ్డా, జట్టును విజయతీరాలకు చేర్చలేకపోయారు.

పంజాబ్ తరఫున యువ ఆటగాడు కూపర్ కాన్లీ (107 నాటౌట్) అద్భుతమైన పోరాటంతో అజేయ శతకం సాధించాడు. 59 బంతుల్లో 8 సిక్సర్లు, 7 ఫోర్లతో ఆడినప్పటికీ, ఇతర బ్యాటర్ల నుంచి సరైన సహకారం లభించకపోవడంతో పంజాబ్ జట్టు 202 పరుగులకే పరిమితమై ఓటమిని అంగీకరించాల్సి వచ్చింది.