బక్రీద్ నేపథ్యంలో గోవుల అక్రమ రవాణాపై పోలీసుల కఠిన నిఘా

జిల్లా ఎస్పీ డా.జి.జానకి షర్మిల ఐపీఎస్ కడెం మండలంలోని పాండవాపూర్ చెక్ పోస్టును ఆకస్మికంగా తనిఖీ చేసి, సిబ్బందికి పలు సూచనలు చేశారు. జిల్లాలోకి ప్రవేశించే ప్రతి వాహనాన్ని క్షుణ్ణంగా తనిఖీ చేయాలని, ముఖ్యంగా పశువులను తరలిస్తున్న వాహనాల పత్రాలను పరిశీలించాలని ఆదేశించారు.

అక్రమ రవాణాకు పాల్పడే వారిపై కఠిన చట్టపరమైన చర్యలు తీసుకోవాలని, రాత్రి వేళల్లో ప్రత్యేక నిఘా కొనసాగించాలని ఎస్పీ సూచించారు. అనుమానాస్పద వాహనాలు లేదా వ్యక్తుల సమాచారం వెంటనే పోలీసులకు తెలియజేయాలని ఆమె కోరారు.

ఈ చర్యలు పండుగ సందర్భంగా శాంతిభద్రతలను కాపాడటంతో పాటు, అక్రమ కార్యకలాపాలను నిరోధించడంలో సహాయపడతాయని అధికారులు తెలిపారు. ప్రజలు కూడా పోలీసులకు సహకరించి, సమాచారం అందించాలని విజ్ఞప్తి చేశారు.