గజ్వేల్ ఎమ్మెల్యే క్యాంపు కార్యాలయంపై దాడి: బీఆర్ఎస్ నాయకుల తీవ్ర విమర్శలు

నిజామాబాద్‌లో శనివారం విలేకరుల సమావేశంలో మాట్లాడిన విఠల్ రావు, క్యాంపు కార్యాలయంపై కాంగ్రెస్ శ్రేణులు దాడి చేయడం ప్రజాస్వామ్యంపై జరిగిన దాడిగా అభివర్ణించారు. అధికార మదంతో కాంగ్రెస్ నాయకులు వ్యవహరిస్తున్నారని, ప్రజా ప్రతినిధుల క్యాంపు కార్యాలయాలపై దాడి చేయడం సరికాదని అన్నారు.

కేసీఆర్ నిర్మించిన క్యాంపు కార్యాలయాలను ఎమ్మెల్యేలు వాడుకోవచ్చని, అయితే కాంగ్రెస్ వారు రేవంత్ రెడ్డి ఫోటో పెట్టాలని డిమాండ్ చేయడం అన్యాయమని విఠల్ రావు అన్నారు. ప్రధానమంత్రుల క్యాంపు కార్యాలయాల్లో వారి ఫోటోలే ఎందుకు పెట్టరని ఆయన ప్రశ్నిస్తూ, రాష్ట్రంలో శాంతిభద్రతలపై ఆందోళన వ్యక్తం చేశారు.

కాంగ్రెస్ పాలనలో ప్రజా ప్రతినిధులపై, ప్రజా సంఘాలపై, మీడియాపై దాడులు నిత్యకృత్యం కావడం సిగ్గుచేటని విఠల్ రావు అన్నారు. పోలీసు యంత్రాంగం కాంగ్రెస్ పార్టీకి ప్రైవేట్ సైన్యంగా మారిపోయిందా అని ప్రశ్నించారు. 'హేట్ స్పీచ్ బిల్' పేరుతో ప్రజల నోళ్లు మూయిస్తూ, మరోవైపు కాంగ్రెస్ గూండాలతో దాడులు చేయించడమేనా మీ పాలన అని విమర్శించారు.

బీఆర్ఎస్ ఎమ్మెల్యేల కార్యాలయాలపై దాడులు చేయాలని కాంగ్రెస్ నాయకులకు సందేశాలు వెళ్ళాయా అని ప్రశ్నించిన విఠల్ రావు, ప్రజాస్వామ్య పునరుద్ధరణ అని చెబుతూ ఉన్న ప్రజాస్వామ్యాన్ని ఖూనీ చేస్తున్నారని అన్నారు. ఎమర్జెన్సీ పాలనను తలపిస్తున్నారని, తమ పార్టీ అణచివేతలకు, నిర్బంధాలకు, దాడులకు భయపడదని, ప్రజాక్షేత్రంలో నిలదీస్తూనే ఉంటామని స్పష్టం చేశారు. దాడులకు పాల్పడిన కాంగ్రెస్ గూండాలను వెంటనే అరెస్ట్ చేయాలని రాష్ట్ర డీజీపీని డిమాండ్ చేశారు. ఇలాంటి దాడులు ఆపకపోతే ప్రజాస్వామ్యాన్ని కాపాడేందుకు ప్రజలే వీధుల్లోకి రావాల్సి వస్తుందని హెచ్చరించారు.