బాసర రాజీవ్ గాంధీ సాంకేతిక విజ్ఞాన విశ్వవిద్యాలయంలో విద్యార్థులు ఎదుర్కొంటున్న సమస్యలను తక్షణమే పరిష్కరించాలని డిమాండ్ చేస్తూ వామపక్ష విద్యార్థి సంఘాల నాయకులు సోమవారం భైంసా సబ్ కలెక్టర్ అజ్మీరా సంకేత్ కుమార్ కు వినతిపత్రం అందజేశారు. విద్యార్థుల సమస్యలపై ఉన్నతాధికారులతో విచారణ జరిపించాలని కోరారు.
వామపక్ష విద్యార్థి సంఘాల నాయకులు మాట్లాడుతూ, బాసర ట్రిపుల్ ఐటీ ప్రాంగణంలో విద్యార్థుల సమస్యలను ప్రభుత్వం వెంటనే పరిష్కరించాలని కోరారు. ఇటీవల ప్రథమ సంవత్సరం విద్యార్థిని భవనం పైనుంచి పడిన ఘటనపై ఉన్నతాధికారులతో సమగ్ర విచారణ జరిపించి వాస్తవాలను బయటపెట్టాలని డిమాండ్ చేశారు.
విశ్వవిద్యాలయ ప్రాంగణంలోని భోజనశాలల్లో నాణ్యత లేని ఆహారం అందిస్తున్నారని, ఆహారంలో పురుగులు, బొద్దింకలు కనిపిస్తున్నాయని నాయకులు ఆరోపించారు. వేలాది మంది విద్యార్థుల ఆరోగ్యంతో ఆటలాడుతున్న భోజనశాల నిర్వహకులపై కఠిన చర్యలు తీసుకోవాలని వారు కోరారు.
విద్యార్థులు తమ సమస్యలను బయటకు తీసుకువస్తున్నారనే కారణంతో తరగతి గదులు, భోజనశాలల్లో మొబైల్ ఫోన్ల వినియోగంపై యాజమాన్యం విధించిన ఆంక్షలను వెంటనే తొలగించాలని డిమాండ్ చేశారు. విద్యార్థుల వ్యక్తిగత స్వేచ్ఛకు భంగం కలిగించే నిర్ణయాలను వ్యతిరేకిస్తున్నామని వారు స్పష్టం చేశారు.
విద్యార్థుల సమస్యలపై సబ్ కలెక్టర్ సానుకూలంగా స్పందించి, విచారణ జరిపించి తగిన చర్యలు తీసుకుంటామని హామీ ఇచ్చారని నాయకులు తెలిపారు. విద్యార్థుల హక్కుల పరిరక్షణకు, విశ్వవిద్యాలయంలో మెరుగైన వసతుల కోసం తమ పోరాటాన్ని కొనసాగిస్తామని ప్రభుత్వాన్ని హెచ్చరించారు.
