ఆదిలాబాద్ జిల్లా పోలీసు కార్యాలయంలో బంగారు ఆభరణాల దుకాణాల యజమానులు, నిర్వాహకులతో జిల్లా ఎస్పీ అఖిల్ మహాజన్ ప్రత్యేక సమావేశం నిర్వహించి, భద్రతా చర్యలపై పలు సూచనలు చేశారు. దొంగతనాలను అరికట్టేందుకు ఆధునిక సీసీ కెమెరాలు, భద్రతా పరికరాలు ఏర్పాటు చేసుకోవాలని ఆయన సూచించారు.
జిల్లాలో, ముఖ్యంగా మహారాష్ట్ర సరిహద్దు ప్రాంతాల్లో బంగారు దుకాణాల యజమానులు అప్రమత్తంగా ఉండాలని ఎస్పీ అఖిల్ మహాజన్ ఆదేశించారు. దొంగతనాలు, చోరీలు నివారించేందుకు దుకాణాల లోపల, బయట ఆధునిక సీసీ కెమెరాలను ఏర్పాటు చేసుకోవాలని, మోషన్ సెన్సార్ అలర్ట్ వ్యవస్థలు, సైరన్ అలారాలు, ఇతర భద్రతా పరికరాలను వినియోగించాలని ఆయన సూచించారు.
సీసీ కెమెరాలకు సంబంధించిన డీవీఆర్ పరికరాలను సురక్షిత ప్రదేశాల్లో భద్రపరచాలని, రాత్రి వేళల్లో ప్రత్యేక నిఘా ఏర్పాటు చేసుకోవాలని తెలిపారు. పెద్ద దుకాణాల్లో ప్రైవేట్ భద్రతా సిబ్బందిని నియమించుకోవడం, మెటల్ డిటెక్టర్లు, ద్వార భద్రతా పరికరాలను వినియోగించడం ఉత్తమమన్నారు. ఆధునిక సాంకేతిక పరిజ్ఞానాన్ని వినియోగించి భద్రతా ప్రమాణాలు పెంచుకోవాలని సూచించారు.
సెకండ్ హ్యాండ్ బంగారం కొనుగోలు సమయంలో పూర్తి పత్రాలు పరిశీలించిన తర్వాతే కొనుగోలు చేయాలని, దొంగ బంగారం కొనుగోలు చేయవద్దని వ్యాపారులను ఎస్పీ హెచ్చరించారు. తెలిసిన వ్యక్తుల వద్ద మాత్రమే బంగారం కొనుగోలు చేయాలని, పూర్తి ధృవీకరణ ప్రక్రియ పాటించాలని, నకిలీ బంగారం మోసాలపై అప్రమత్తంగా ఉండాలని సూచించారు.
పట్టణంలో డైలీ 100, పెట్రోలింగ్ సిబ్బంది ద్వారా నిరంతర గస్తీ నిర్వహిస్తున్నామని, అనుమానాస్పద వ్యక్తుల సమాచారాన్ని వెంటనే డయల్-100కు అందించాలని కోరారు. ఇంటర్సెప్టర్ వాహనాల సహాయంతో అదనపు గస్తీ చర్యలు చేపడుతున్నట్లు తెలిపారు. ఈ సమావేశంలో ఆదిలాబాద్ డీఎస్పీ ఎల్. జీవన్ రెడ్డి, వన్టౌన్ సీఐ బి. సునీల్ కుమార్, బంగారు దుకాణ వ్యాపారుల సంఘం ప్రతినిధులు, యజమానులు, వ్యాపారులు పాల్గొన్నారు.
