జీవితం విలువైనదని, క్షణికావేశాలకు లోనుకాకుండా, సంతోషంగా, సంతృప్తితో జీవించాలని తెలంగాణ ఎడ్యుకేషన్ ఫోరం అధ్యక్షులు నేదునూరి కనకయ్య పిలుపునిచ్చారు. మానసిక ఆరోగ్యం, సానుకూల దృక్పథం, ఆత్మవిశ్వాసం వంటి అంశాలపై ఆయన తన అభిప్రాయాలను పంచుకున్నారు.
క్షణికావేశాలకు గురికావద్దని, జీవితాన్ని బలిచేయకూడదని, పోరాటమే జీవితానికి హద్దు కావాలని నేదునూరి కనకయ్య అన్నారు. గెలుపోటములు, పొగడ్తలు, తెగడ్తలు సహజమని, సమస్యలకు భయపడకుండా ధైర్యంతో ఎదుర్కోవాలని, సహనాన్ని పెంచుకోవాలని ఆయన సూచించారు. నేటి కృషియే రేపటి ఫలితమని, సంకల్పమే ఆయుధమని ఆయన పేర్కొన్నారు.
గతాన్ని, వర్తమానాన్ని మరువకుండా, పోలికలకు పోకుండా, అహంకారానికి దూరంగా ఉండాలని కనకయ్య సూచించారు. ఆశను ఆభరణంగా చేసుకుంటే ఆందోళన మాయమవుతుందని, ఆత్మవిశ్వాసంతో ముందుకు సాగితే నిర్మలత్వం, ఆనందం లభిస్తాయని ఆయన వివరించారు. కుంగుబాటును వీడి, ఉల్లాసంగా, ఉత్సాహంగా జీవించడం ద్వారా సంతోషాన్ని, సంతృప్తిని పొందవచ్చని ఆయన అన్నారు.
సానుకూల దృక్పథాన్ని పెంచుకోవాలని, సంతోషాలను పంచుకోవాలని, వ్యక్తిత్వ వికాసం, పుస్తక పఠనం, సజ్జన సాంగత్యం, సమాజ సేవ, ఆధ్యాత్మిక చింతన వంటి వాటిని అలవర్చుకోవాలని కనకయ్య సూచించారు. మానసిక ఆరోగ్య సంరక్షణతో ఆత్మహత్యలను అరికట్టవచ్చని, ఆరోగ్యకరమైన జీవనమే ముఖ్యమని ఆయన నొక్కి చెప్పారు. కుటుంబ వ్యవస్థను బలోపేతం చేయడం ద్వారా ప్రేమ, ఆత్మీయత, అనురాగ బంధాలను పెంపొందించుకోవాలని ఆయన పిలుపునిచ్చారు.
మనోధైర్యం అనే ఆయుధంతో ఆత్మహత్యలను అరికట్టాలని, ఇతరులతో పోల్చుకుంటూ బాధపడే సమయాన్ని తమ అభివృద్ధికి పెట్టుబడిగా మార్చుకోవాలని కనకయ్య సూచించారు. అసంతృప్తితో కాకుండా ఆనందంగా జీవించవచ్చని, మనల్ని మనం ప్రేమించుకోవాలని, మనకంటూ ఒక బ్రాండును సృష్టించుకోవాలని, సంతృప్తియే జీవన సాఫల్యం అని గుర్తెరిగి జీవించాలని ఆయన సందేశమిచ్చారు.
