పూర్వ విద్యార్థి విరాళం: శ్రీ సరస్వతీ శిశు మందిర్ పాఠశాలకు పోడియం

బైంసా పట్టణంలోని గుజిరిగల్లిలో ఉన్న శ్రీ సరస్వతీ శిశు మందిర్ పాఠశాల విద్యార్థుల కోసం పూర్వ విద్యార్థి ఎ. వెంకటేష్ ఒక పోడియంను విరాళంగా అందించారు. ఈ పోడియంను పాఠశాలలో జరిగే ప్రార్థనలు, ఉత్సవాలు, మరియు ఇతర కార్యక్రమాలలో ఉపయోగించనున్నారు.

పోడియంను అందజేసిన అనంతరం వెంకటేష్ మాట్లాడుతూ, తాను ఈ పాఠశాలలోనే విద్యాభ్యాసం చేశానని, ఇక్కడి క్రమశిక్షణ, విద్యా విలువలు తన ఎదుగుదలకు దోహదపడ్డాయని తెలిపారు. పాఠశాల అభివృద్ధికి ఎల్లప్పుడూ తన మద్దతు ఉంటుందని ఆయన పేర్కొన్నారు.

విద్యార్థులు ఉన్నత లక్ష్యాలను నిర్దేశించుకుని, కష్టపడి చదివి ఉన్నత స్థానాలకు చేరుకోవాలని, తద్వారా తమ తల్లిదండ్రులకు, గురువులకు, పాఠశాలకు గర్వకారణం కావాలని వెంకటేష్ ఆకాంక్షించారు. శిశు మందిర్ పాఠశాలల నుండి వచ్చిన అనేక మంది విద్యార్థులు ప్రస్తుతం వివిధ రంగాలలో ఉన్నత స్థాయిలో ఉన్నారని ఆయన ఉదహరించారు.

ఈ కార్యక్రమంలో జిల్లా కార్యదర్శి పురస్తు గోపాల్ కిషన్, పాఠశాల అధ్యక్షులు డి. శ్రీధర్, సమితి/ప్రబంధ కారిణి సభ్యులు, ప్రధాన ఆచార్యులు రాముల గంగాధర్, ఇతర ఉపాధ్యాయులు, విద్యార్థులు పాల్గొన్నారు.