నిర్మల్ పట్టణంలోని నాగార్జున నర్సింగ్ కళాశాలలో విద్యార్థినుల భద్రత, సైబర్ నేరాలు, సామాజిక సమస్యలపై షీ టీమ్ ఆధ్వర్యంలో అవగాహన కార్యక్రమం నిర్వహించారు. జిల్లా ఎస్పీ జానకి షర్మిల ఆదేశాల మేరకు ఈ కార్యక్రమం జరిగింది.
సుమారు 70 మంది నర్సింగ్ విద్యార్థినులు పాల్గొన్న ఈ కార్యక్రమంలో, షీ టీమ్ను ఎలా సంప్రదించాలి, ఎలాంటి పరిస్థితుల్లో వారి సహాయం తీసుకోవాలి అనే విషయాలను సిబ్బంది వివరించారు. విద్యార్థినులకు భరోసా కల్పిస్తూ, మహిళల భద్రతే తమ ప్రథమ కర్తవ్యమని పేర్కొన్నారు.
పెరుగుతున్న సైబర్ నేరాలపై విద్యార్థినులకు అవగాహన కల్పించారు. మొబైల్, సోషల్ మీడియా వినియోగంలో జాగ్రత్తలు, సైబర్ దాడుల నుంచి రక్షణ మార్గాలను ఉదాహరణలతో వివరించారు. అత్యవసర పరిస్థితుల్లో 100/112, సైబర్ నేరాలకు 1930 హెల్ప్లైన్లను సంప్రదించాలని సూచించారు.
టీ-సేఫ్ యాప్ వినియోగం, బాల్య వివాహాలు, మహిళల అక్రమ రవాణా వంటి సామాజిక సమస్యలపై కూడా అవగాహన కల్పించారు. వేధింపులను ఎలా ఎదుర్కోవాలి, ఎవరిని సంప్రదించాలి అనే అంశాలపై స్పష్టత ఇచ్చారు. ఈ కార్యక్రమం విద్యార్థినులకు ఎంతో ప్రయోజనకరంగా ఉందని కళాశాల యాజమాన్యం తెలిపింది.
ఈ అవగాహన కార్యక్రమంలో షీ టీమ్ సిబ్బంది, కళాశాల యాజమాన్యం, సిబ్బంది, విద్యార్థులు పాల్గొన్నారు. భవిష్యత్తులో ఇలాంటి కార్యక్రమాలను కొనసాగించాలని విద్యార్థులు కోరారు.
