భర్త హత్య కేసులో భార్య, ప్రియుడితో సహా ఎనిమిది మంది అరెస్ట్

హన్మకొండ జిల్లా, పరకాలలో జరిగిన ఈ దారుణ హత్య కేసులో పోలీసులు కీలక పురోగతి సాధించారు. సుమన్ అనే వ్యక్తిని అతని భార్య లావణ్య, ఆమె ప్రియుడు కలిసి హత్య చేసినట్లు దర్యాప్తులో తేలింది. వివాహేతర సంబంధానికి అడ్డు వస్తున్నాడనే కారణంతోనే ఈ హత్య జరిగినట్లు పోలీసులు తెలిపారు.

లావణ్యకు కమలాపూర్ మండలం వంగపల్లికి చెందిన ఒక వ్యక్తితో వివాహేతర సంబంధం ఏర్పడింది. ఈ విషయంపై భార్యాభర్తల మధ్య తరచుగా గొడవలు జరుగుతుండేవి. దీంతో, భర్తను అడ్డు తొలగించుకోవాలని లావణ్య, తన ప్రియుడితో కలిసి ఒక పథకం రచించింది. ఈ పథకంలో భాగంగా, ఒక ముఠాకు సుఫారీ ఇచ్చినట్లు సమాచారం.

ఈ నెల 3వ తేదీ నుంచి సుమన్ కనిపించకుండా పోవడంతో, అతని తండ్రి పోలీసులకు ఫిర్యాదు చేశారు. మిస్సింగ్ కేసు నమోదు చేసుకున్న పోలీసులు దర్యాప్తు చేపట్టారు. విచారణలో భాగంగా, భార్య లావణ్యపై అనుమానం రావడంతో, ఆమెను అదుపులోకి తీసుకుని విచారించారు. ఈ విచారణలో, ఆమె తన ప్రియుడితో కలిసి భర్తను హత్య చేసినట్లు అంగీకరించింది.

సుఫారీ గ్యాంగ్ మొదట సుమన్‌ను బీరు సీసాలతో విచక్షణారహితంగా పొడిచి చంపిందని, అనంతరం ఈ నెల 4వ తేదీన ములుగు జిల్లా గోవిందరావుపేట మండలం దయ్యాలవాగు సమీపంలో సుమన్ మృతదేహాన్ని పెట్రోల్ పోసి తగులబెట్టినట్లు పోలీసులు తెలిపారు. ఈ ఘటనకు సంబంధించి లావణ్య, ఆమె ప్రియుడు, సుఫారీ తీసుకున్న వ్యక్తులతో సహా మొత్తం ఎనిమిది మందిని పోలీసులు అరెస్టు చేశారు.