భూ సమస్యలకు రీ-సర్వేతోనే మోక్షం: రైతుల ఆకాంక్ష

గ్రామాల వారీగా భూ సమస్యల గుర్తింపు

ప్రభుత్వం ఒకసారి రాష్ట్రవ్యాప్తంగా గ్రామాల వారీగా భూ సమస్యల ప్రత్యేక సర్వే నిర్వహిస్తే ఎన్నో సమస్యలకు శాశ్వత పరిష్కారం చూపవచ్చని రైతులు అభిప్రాయపడుతున్నారు. ప్రతి గ్రామంలో పెండింగ్ భూ సమస్యల జాబితా తయారు చేసి వాటిని వారసత్వ వివాదాలు, పట్టా మార్పిడి, సరిహద్దు సమస్యలు, రికార్డు సవరణ, సాగు హక్కు, ప్రభుత్వ భూములు, చెరువు శిఖం, అసైన్డ్ భూములు తదితర విభాగాలుగా గుర్తించాలి. ఏ సమస్యను ఏ అధికారి పరిష్కరించాలి ఎప్పటిలోగా పరిష్కరించాలి అనే అంశాలకు స్పష్టమైన గడువు విధించాలని రైతులు కోరుతున్నారు.

ప్రభుత్వ, చెరువు శిఖం భూముల గుర్తింపు

మరోవైపు చెరువు శిఖం, ప్రభుత్వ, అసైన్డ్ భూముల విషయంలోనూ రీ-సర్వే అవసరమని రైతులు చెబుతున్నారు. ఏ భూమి ప్రభుత్వానికి చెందింది ఏది పట్టా భూమి ఏది చెరువు శిఖం అన్నది క్షేత్రస్థాయిలో గుర్తించి రికార్డుల్లో స్పష్టంగా నమోదు చేయాలి. భూమి స్వరూపంపై స్పష్టత లేకపోవడం వల్ల భవిష్యత్తులో కొత్త ఆక్రమణలు, వివాదాలు, ప్రభుత్వ ప్రయోజనాల దుర్వినియోగం జరగకుండా ముందస్తు చర్యలు తీసుకోవాలని కోరుతున్నారు.

భూభారతి లక్ష్యం, రైతులకు స్పష్టత

భూభారతి లక్ష్యం కేవలం కొత్త దరఖాస్తులను పరిష్కరించడం కాకుండా పాత భూ రికార్డుల్లో ఉన్న తప్పులను సరిచేయడం, రైతులకు చట్టబద్ధమైన హక్కులపై స్పష్టత కల్పించడం కావాలని రైతులు అంటున్నారు. అందుకు రీ-సర్వేను ప్రధాన సాధనంగా ఉపయోగించాలని విజ్ఞప్తి చేస్తున్నారు. రీ-సర్వే సమయంలో గ్రామస్థాయిలో ప్రజలకు ముందుగానే సమాచారం ఇచ్చి, భూమి యజమానులు, సాగుదారులు, పొరుగుభూముల యజమానుల సమక్షంలో సరిహద్దులను పరిశీలిస్తే వివాదాలకు అవకాశం తగ్గుతుందని సూచిస్తున్నారు.

డిజిటల్ రికార్డుల అనుసంధానం

రీ-సర్వే పూర్తయిన తర్వాత ప్రతి సర్వే నంబర్కు సంబంధించిన భూమి విస్తీర్ణం, సరిహద్దులు, భూమి స్వరూపం, అందుబాటులో ఉన్న హక్కుల రికార్డులను డిజిటల్గా అనుసంధానం చేసి రైతులకు అందుబాటులో ఉంచాలని కోరుతున్నారు. భవిష్యత్తులో ఒకే భూమిపై పలువురు హక్కులు చెప్పే పరిస్థితి రాకుండా పాత, కొత్త రికార్డులను సమన్వయం చేయాలని విజ్ఞప్తి చేస్తున్నారు.

తరతరాలుగా కొనసాగుతున్న వివాదాలు

భూమి సమస్య పరిష్కారంలో ఆలస్యం కుటుంబాల మధ్య వివాదాలను మరింత పెంచుతుందని రైతులు ఆవేదన వ్యక్తం చేస్తున్నారు. ఒక తరం సమస్య మరో తరానికి, అక్కడి నుంచి మూడో తరానికి చేరుతున్న పరిస్థితి ఉందని చెబుతున్నారు. భూమి ధరలు మరింత పెరిగే కొద్దీ ఇలాంటి వివాదాలు మరింత తీవ్రమయ్యే ప్రమాదం ఉందని హెచ్చరిస్తున్నారు. ఇప్పుడే ప్రత్యేక కార్యాచరణ చేపట్టకపోతే భవిష్యత్తులో సమస్యలు మరింత సంక్లిష్టమయ్యే అవకాశం ఉందని అంటున్నారు.

ప్రభుత్వానికి రైతుల విజ్ఞప్తి

అందుకే రాష్ట్ర ప్రభుత్వం భూభారతి కింద ప్రత్యేక నిర్ణయం తీసుకోవాలని రైతులు కోరుతున్నారు. ప్రతి జిల్లాలో ప్రత్యేక భూ సమస్యల పరిష్కార బృందాలు ఏర్పాటు చేయాలి. ప్రతి మండలంలో పెండింగ్ కేసుల జాబితా రూపొందించాలి. ప్రతి గ్రామంలో అవసరమైన చోట రీ-సర్వే నిర్వహించాలి. పాత రికార్డులను ప్రస్తుత రికార్డులతో సరిపోల్చాలి. రికార్డు, క్షేత్రస్థాయి సాగు, సరిహద్దులు, వారసత్వ ఆధారాలను సమగ్రంగా పరిశీలించాలి. వివాదాస్పద కేసులకు ఇరుపక్షాల వాదనలు విని చట్టపరమైన పరిష్కారం చూపాలి. రైతు కార్యాలయాల చుట్టూ తిరగకుండా సమస్య పరిష్కార ప్రక్రియను గ్రామస్థాయికి తీసుకెళ్లాలి.

సమస్య అక్కడే పరిష్కరించాలి

భూమి ఎక్కడ ఉందో అక్కడే సమస్యను పరిశీలించి పరిష్కరించాల్సిన అవసరం ఉందని రైతులు స్పష్టం చేస్తున్నారు. మా భూమిని కొలవడమే కాదు.. మా సమస్యను కూడా కొలిచి పరిష్కరించాలి. రికార్డులో ఎవరి పేరు ఉందో మాత్రమే కాదు.. ఆ రికార్డు ఎలా వచ్చింది భూమిని ఎవరు సాగు చేస్తున్నారు పాత ఆధారాలు ఏమి చెబుతున్నాయి అన్నీ పరిశీలించాలి అని బాధితులు కోరుతున్నారు.

చారిత్రక నిర్ణయం తీసుకోవాల్సిన సమయం

భూభారతి ప్రభుత్వానికి ఒక అవకాశం. తరతరాలుగా పేరుకుపోయిన భూ సమస్యలకు ముగింపు పలికే చారిత్రక నిర్ణయం తీసుకునే సమయం ఇదే. రీ-సర్వేను కేవలం భూమి కొలతల కార్యక్రమంగా కాకుండా.. భూ రికార్డుల ప్రక్షాళన, సరిహద్దుల నిర్ధారణ, హక్కుల పరిశీలన, వివాదాల పరిష్కారంతో అనుసంధానం చేస్తే వేలాది కుటుంబాలకు ఊరట లభించే అవకాశం ఉంది. ప్రభుత్వం రాష్ట్రవ్యాప్తంగా ప్రత్యేక భూ పరిష్కార కార్యక్రమాన్ని ప్రకటించి, గ్రామాల వారీగా రీ-సర్వే చేపట్టి, గడువులోగా సమస్యలకు పరిష్కారం చూపాలని రైతులు కోరుతున్నారు. ఈ తరంలోనే భూ సమస్యకు ముగింపు అనే లక్ష్యంతో ప్రభుత్వం నిర్ణయం తీసుకుంటే భూభారతి చట్టం ఉద్దేశ్యం నిజంగా నెరవేరినట్టవుతుంది.