వరి ధాన్యం తరలింపు ప్రక్రియలో ఎటువంటి ఆలస్యం జరగకుండా చూడాలని జిల్లా కలెక్టర్ భవేశ్ మిశ్రా సంబంధిత అధికారులను ఆదేశించారు. కొనుగోలు కేంద్రాల్లో ధాన్యం నిల్వలు పేరుకుపోకుండా ఎప్పటికప్పుడు మిల్లులకు తరలించాలని సూచించారు.
నిర్మల్ జిల్లా కలెక్టరేట్ సమావేశ మందిరంలో సోమవారం ధాన్యం సేకరణ, రవాణాపై అధికారులతో నిర్వహించిన సమీక్షా సమావేశంలో కలెక్టర్ ఈ ఆదేశాలు జారీ చేశారు. రైతుల నుంచి సేకరించిన ధాన్యాన్ని సకాలంలో మిల్లులకు తరలించడం అత్యవసరమని, కొనుగోలు కేంద్రాల్లో ఎక్కువ కాలం నిల్వ ఉంచడం వల్ల ఇబ్బందులు తలెత్తుతాయని ఆయన తెలిపారు.
రాబోయే రోజుల్లో ధాన్యం రాక మరింత పెరిగే అవకాశం ఉన్నందున, ముందస్తు ప్రణాళికతో అదనపు లారీలను అందుబాటులో ఉంచుకోవాలని కలెక్టర్ సూచించారు. రవాణా వాహనాల కొరత లేకుండా చూసుకోవడంతో పాటు, ధాన్యం లోడింగ్, అన్లోడింగ్ పనులకు అవసరమైన హమాలీలను సమకూర్చుకోవాలని ఆదేశించారు. ప్రతిరోజూ జరిగిన ధాన్యం తరలింపు వివరాలను నివేదించాలని సూచించారు.
ఇప్పటివరకు జరిగిన ధాన్యం తరలింపు పురోగతిని, కొనుగోలు కేంద్రాల్లో ప్రస్తుతం ఉన్న నిల్వలపై కలెక్టర్ అధికారులను అడిగి తెలుసుకున్నారు. ఈ సమావేశంలో అదనపు కలెక్టర్ (రెవెన్యూ) కిషోర్ కుమార్, పౌర సరఫరాల శాఖ అధికారులు, డీఆర్డీఓ, లారీ ట్రాన్స్పోర్ట్ ప్రతినిధులు పాల్గొన్నారు.
