నిర్మల్ జిల్లా మామడ మండలంలోని కొరిటికల్ గ్రామంలో 'అన్నదాత-విద్యుత్ ప్రదాత' కార్యక్రమం జరిగింది. తెలంగాణ ప్రభుత్వం చేపట్టిన రైతు వారోత్సవాలలో భాగంగా నిర్వహించిన ఈ కార్యక్రమంలో, వ్యవసాయం మరియు విద్యుత్ రంగాలకు సంబంధించిన పలు పథకాలు, సౌకర్యాలపై రైతులకు అధికారులు వివరించారు.
ప్రభుత్వ ఆదేశాల మేరకు నిర్వహించిన ఈ కార్యక్రమంలో, నిర్మల్ మార్కెట్ కమిటీ చైర్మన్ భీంరెడ్డి అధ్యక్షత వహించారు. హైదరాబాద్ అగ్రికల్చర్ కమీషనరేట్ జాయింట్ డైరెక్టర్ బాలు నాయక్, జిల్లా వ్యవసాయ అధికారి అంజిప్రసాద్, విద్యుత్ శాఖ డి.ఇ. వెంకటేశ్వర్లు, మామడ ఏ.ఇ. బాలయ్య ముఖ్య అతిథులుగా హాజరయ్యారు.
విద్యుత్ అధికారులు మాట్లాడుతూ, ప్రధానమంత్రి కుసుమ్ యోజన కింద సోలార్ పవర్ ప్రాజెక్టుల ఏర్పాటు, గృహజ్యోతి పథకం, వ్యవసాయ బోర్లకు కొత్త కనెక్షన్లు తదితర అంశాలపై రైతులకు అవగాహన కల్పించారు. బ్యాంకు రుణ సదుపాయంతో సోలార్ ప్రాజెక్టులు ఏర్పాటు చేసి, విద్యుత్తును ప్రభుత్వానికి విక్రయించే అవకాశాలను వివరించారు.
వ్యవసాయాధికారులు వ్యవసాయ యాంత్రీకరణ, DBT పద్ధతిలో యంత్ర పరికరాల సరఫరా, డ్రోన్ సదుపాయం, నానో యూరియా వాడకం గురించి తెలియజేశారు. మట్టి నమూనా పరీక్షలు చేయించుకొని, సరైన ఎరువులు వాడాలని సూచించారు. కేవలం రూ.200తో మట్టి పరీక్షలు చేయించుకునే సౌకర్యం అందుబాటులో ఉందని తెలిపారు.
ఈ కార్యక్రమంలో స్థానిక ప్రజాప్రతినిధులు, అధికారులు, వ్యవసాయ విస్తరణ అధికారులు, విత్తన డీలర్లు, రైతులు పెద్ద సంఖ్యలో పాల్గొన్నారు. రైతు సంక్షేమానికి ప్రభుత్వం కట్టుబడి ఉందని అధికారులు ఈ సందర్భంగా తెలిపారు.
