రైతు ఉద్యమానికి సన్నాహాలు: ఆగస్టు 10న దేశవ్యాప్త జైల్ భరో

దశాబ్దాల చట్టాల మార్పు ప్రమాదకరం

కార్పొరేట్ కంపెనీలు, ఎగుమతి దిగుమతి వ్యాపారుల ప్రయోజనాల కోసం దశాబ్దాలుగా రైతుల ప్రయోజనాలను కాపాడుతున్న చట్టాలన్నింటినీ మార్పు చేశారని వై కేశవరావు తెలిపారు. వ్యవసాయ మార్కెట్ల చట్టాన్ని సవరించి, పంటలకు మద్దతు ధరలు ఉండవని, ప్రభుత్వ ఏజెన్సీల కొనుగోలు ఉండదని, వ్యాపారుల ఇష్టారాజ్యం అవుతుందని ఆయన అన్నారు. సహకార వ్యవస్థలన్నీ కంపెనీలు, వ్యాపారుల పరం అవుతాయని, వ్యాపారుల ప్రతినిధులు సంఘాలలో చేరడానికి, అధ్యక్షులుగా ఎన్నికవ్వడానికి వీలు కల్పించారని ఆయన పేర్కొన్నారు. విద్యుత్ సవరణ చట్టం ప్రకారం ఐదేళ్లలో సబ్సిడీలన్నీ రద్దు చేస్తారని, సబ్స్టేషన్లు, విద్యుత్ లైన్లు ప్రైవేటు కంపెనీల హస్తగతం అవుతాయని, స్మార్ట్ మీటర్ల ఖర్చులను కూడా ప్రజలే భరించాలని ఆయన అన్నారు. విత్తన చట్టంలో మార్పులు చేసి, నకిలీ విత్తనాల వల్ల నష్టపోయిన రైతులకు నష్టపరిహారం ఇచ్చే విధానాన్ని తొలగించారని, నకిలీ విత్తనాలు సరఫరా చేసిన కంపెనీలు, వ్యాపారులను మూడు తప్పుల వరకు వదిలేయాలని పేర్కొన్నారని ఆయన విమర్శించారు. ప్రకృతి వైపరీత్యాలు వచ్చినప్పుడు పంటలు దెబ్బతిన్న రైతులకు నష్టపరిహారం ఇచ్చే క్లాజులు, రుణాలు రీషెడ్యూల్ చేసే క్లాజులు తొలగించారని, ఎరువులపై నియంత్రణ తొలగించి, ఎప్పటికప్పుడు ధరలు పెంచుకునే అవకాశం కల్పించారని ఆయన తెలిపారు. యూరియాకు బదులు నిర్దారించని నానో లిక్విడ్ ప్రవేశపెట్టారని, మహాత్మా గాంధీ గ్రామీణ ఉపాధి పథకం నిధులు ఉన్నంతవరకే అని చేర్చారని, గ్రామాల అవసరాలతో నిమిత్తం లేకుండా కేంద్ర ప్రభుత్వ పథకాలకు మాత్రమే వర్తింపజేశారని ఆయన పేర్కొన్నారు. భూసేకరణ చట్టాలన్నీ సవరించి, కార్పొరేట్ కంపెనీలకు, సోలార్ కంపెనీలకు, గ్రీన్ ఎనర్జీ కంపెనీలకు చౌకగా భూములు కౌలుకు ఇచ్చే విధానం ప్రకటించారని, ఆ భూములు తిరిగి రైతులకు వస్తాయనే గ్యారెంటీ లేదని ఆయన అన్నారు. పంటల బీమా స్వచ్ఛందం అని చెప్పి, ప్రీమియం పెంచారని, ప్రైవేటు కంపెనీల లాభాలను గ్యారెంటీ చేశారని ఆయన తెలిపారు.

రైతులు కోరుతున్న చట్టాలు

అమెరికాతో సహా అన్ని ఫ్రీ ట్రేడ్ అగ్రిమెంట్లు రద్దు చేయాలని, సి250 ప్రకారం అన్ని పంటలకు మద్దతు ధరల గ్యారెంటీ చట్టం చేయాలని, నాలుగు లేబర్ కోడ్లను ఉపసంహరించుకోవాలని, కనీస వేతనం రూ.31 వేలు ఇవ్వాలని వై కేశవరావు డిమాండ్ చేశారు. రైతులు, కౌలు రైతులు, వ్యవసాయ కార్మికులు, గ్రామీణ పేదల రుణాలు రద్దు చేయాలని, ఆత్మహత్యలు చేసుకున్న వారిపై ఆధారపడిన కుటుంబాలకు రూ.25 లక్షలు పరిహారం ఇవ్వాలని ఆయన కోరారు. మహాత్మా గాంధీ ఉపాధి పథకాన్ని పునరుద్ధరించి, 200 రోజుల పని, రూ.700 కూలి ఇవ్వాలని, కార్పొరేట్ల కోసం నిర్బంధ భూసేకరణ నిలిపివేయాలని, 2013 భూసేకరణ చట్టం, ఫారెస్ట్ రైట్స్ యాక్ట్ 170 అమలు పరచాలని ఆయన విజ్ఞప్తి చేశారు. విద్యుత్, విత్తన, ప్రకృతి వైపరీత్యాల చట్టాల సవరణలన్నీ ఉపసంహరించుకోవాలని ఆయన డిమాండ్ చేశారు.

పోరాటానికి నిర్దిష్ట రూపాలు

పై చట్టాల సాధనకై దీర్ఘకాలిక పోరాటాలను రూపొందించినట్లు వై కేశవరావు తెలిపారు. 2026 నవంబర్ 26 నుండి దేశంలో 100 కేంద్రాలలో దీక్షా శిబిరాలు నిర్వహించాలని, అక్టోబర్ 3 నుండి లఖింపూర్ ఖేరీ అమరుల రోజు నుండి వాలంటీర్లను నమోదు చేయాలని ఆయన చెప్పారు. అందుకు సన్నాహంగా సెప్టెంబరు నెలాఖరు లోపుగా రాష్ట్రస్థాయిలో రైతు సంఘాల, ట్రేడ్ యూనియన్ల జాయింట్ సదస్సు జరపాలని సూచించారు. ఈ పోరాటానికి ముందస్తుగా ఆగస్టు 10న క్విట్ ఇండియా ఉద్యమ స్ఫూర్తితో దేశం మొత్తం పై 1000 కేంద్రాల్లో జైల్ భరో కార్యక్రమం నిర్వహించాలని, ఈ సందర్భాన్ని వివరిస్తూ కరపత్రాలు, ర్యాలీలు, ట్రాక్టర్ ర్యాలీల ద్వారా రైతాంగంలో చైతన్యం కలిగిస్తూ పెద్ద ఎత్తున ప్రచారం సాగించాలని ఆయన పిలుపునిచ్చారు. ఆగస్టు 10న జరిగే జైల్ భరో కార్యక్రమం రాబోయే పోరాటానికి స్ఫూర్తినివ్వాలని, గ్రామగ్రామాన రైతులను, వ్యవసాయ కార్మికులను, కౌలు రైతులను, గ్రామీణ పేదలను, స్కీము వర్కర్లను చైతన్యపరచి ఐక్యపరచాలని ఆయన అన్నారు. పంటలకు మద్దతు ధరలు కల్పిస్తానన్న మోడీ ప్రభుత్వం సి250 ఫార్ములాకు బదులుగా మోసపూరితమైన ఎ2ఎఫ్.ఎల్ విధానాన్ని ప్రకటించిందని, దీనివల్ల రైతులు భారీగా నష్టపోతున్నారని ఆయన పునరుద్ఘాటించారు.