- మెదక్ ఎస్పీ ఉదయ్‌కుమార్‌రెడ్డి ప్రత్యేక చొరవతో క్విక్ రెస్పాన్స్ బృందం ఏర్పాటైంది
- గుండు వాగులో చిక్కుకున్న వ్యక్తిని కాపాడిన బృందం
- డీజీపీ డాక్టర్ జితేందర్ బృందాన్ని అభినందించారు
మెదక్ జిల్లా టేక్మాల్ పరిధిలో గుండు వాగులో చెక్‌డ్యాం వద్ద చేపలు పట్టే క్రమంలో జారిపడి కొట్టుకుపోయిన వ్యక్తిని క్విక్ రెస్పాన్స్ బృందం సత్వర చర్యతో రక్షించింది. ఈ బృందాన్ని ఎస్పీ ఉదయ్‌కుమార్‌రెడ్డి ప్రత్యేకంగా ఏర్పాటు చేయగా, ప్రాణాపాయంలో ఉన్న వ్యక్తిని రక్షించడంపై డీజీపీ జితేందర్ అభినందనలు తెలియజేశారు.
మెదక్ జిల్లా టేక్మాల్ పరిధిలో గుండు వాగులో మూడు రోజులుగా కురుస్తున్న భారీ వర్షాల కారణంగా వాగు ఉద్ధృతంగా ప్రవహిస్తోంది. నల్లకుంట తండాకు చెందిన నంద్యనాయక్ చేపలు పట్టేందుకు చెక్‌డ్యాం వద్దకు వెళ్లగా, ప్రమాదవశాత్తు జారిపడి కొద్దిదూరం నీటిలో కొట్టుకుపోయాడు. అతను చెట్టు కొమ్మను పట్టుకొని సాయం కోసం ఎదురుచూస్తుండగా, స్థానికులు పోలీసులకు సమాచారం అందించారు.
వేగంగా స్పందించిన మెదక్ ఎస్పీ ఉదయ్‌కుమార్‌రెడ్డి ఆధ్వర్యంలో ఏర్పాటైన క్విక్ రెస్పాన్స్ బృందం, వాగు సమీపంలో ఉన్న హోంగార్డు మహేశ్ ఆధ్వర్యంలో ప్రాణాపాయంలో ఉన్న నంద్యనాయక్‌ను రక్షించారు. మహేశ్ చాకచక్యంగా తాడును ఉపయోగించి అతన్ని సురక్షితంగా ఒడ్డుకు తీసుకువచ్చాడు.
ఈ క్రమంలో, క్విక్ రెస్పాన్స్ బృందం సభ్యులు శ్రీనివాస్, సురేష్ నాయక్, కృష్ణ, రమేశ్ కూడా తమ సహాయంతో ఘటనను విజయవంతంగా పరిష్కరించారు. వారి సహసానికి మెదక్ ఎస్పీతో పాటు డీజీపీ డాక్టర్ జితేందర్ కూడా అభినందనలు తెలిపారు.
